Brussel(Belgium)ကလည်ပတ်စရာနေရာလေးများ

မင်္ဂလာပါရှင်~~~

ပြီးခဲ့တဲ့၂၀၁၁ မတ်လဆန်းပိုင်းတုံးကပါ။

တိမ်ပြာပြာနေ့ တနေ့ ဆန်းဒေးမှာကွယ်... ဆိုသလိုပါဘဲ၊

ကျမတို့ ဒီတခါအင်မတန်မှကောင်းတဲ့ ရာသီဥတုလေးနဲ့ Brussel ကိုအလည်ထွက်ခဲ့ကြပါတယ်။

ယူရိုနိုင်ငံတွေကိုတခုကြိုက်တာ ဗီဇာမလိုဘဲ အားလုံးသွားနိုင်တာလေ။

ခုလည်းကျမတို့ နေခဲ့တဲ့ Oostvoorne Holland ကနေမနက်စောစောထွက် 

ဘတ်စ်ကား ၁ခါ ရထား ၂ခါပြောင်းစီးရင် ရောက်တယ်လေ။ 

(ဒီတခါတော့ ဒါတ်ဒါတ်လေးတွေနဲ့ မျက်စိညောင်းအောင်လုပ်တော့မှာနော်..) 

 မြို့ လေးကကုန်းပေါ်ကနေစီးကြည့်ရင် လှပသပ်ရပ်နေတယ်..။

 ဘူတာရုံကြီး..။

စောလွန်းလို့ tour bus(sightseeing )ကားကမရောက်သေးတော့ ဘူတာနားတ၀ိုက်လမ်းတလားကြတာလေ။

 ဘုရားရှိခိုးကျောင်း..။

အ၀င်ဝက အနုပညာလက်ရာတွေ..။

ဘတ်စကားပေါ်ကနားကြပ်လေးနားထောင်ပြီး ရမ်းသမ်းရွှီးရရင် နာမည်ကြီးကျောက်တိုင်ပေါ့..ဟဲ

(တော်ပြီပေါ့နော်.သိပ်လည်းမသိဘူးလေ.စာရွက်ကိုအိမ်ကနေ ပရင့်ထုတ်ပြီးဘယ်သွားလည်ရမလဲဆိုတာ အစီအစဉ်လေးတော့ရှိသား။ သိပ်မိုးမချုပ်ခင် အမ်စတာဒမ်ပြန်ရောက်မှဖြစ်မယ်လေ)

ဟိုးမြင်ရတဲ့ အလုံးကြီးတွေကိုလည်းသွားခဲ့တယ်။

Royal Palace

ဟိုးးးမှာတွေ့ လား..။ကျမဆိုအကျယ်ကြီးထအော်တာ။ဒါငါတို့ နိုင်ငံက...။

ငါတို့ ခေါင်းဆောင် ဒေါ်အောင်ဆန်းစုကြည်..ကွ။

ယူရိုပါလီမန်အဆောက်အဦရှေ့ ၂ ဖက်လုံးမှာ..ခေါင်းစီးစားလုံးအကြီးကြီးနဲ့ ။
ရှေ့ က အိန္ဒိယစုံတွဲလေးတော့ ပြုံးပြပါတယ်။
ကျန်တာတော့ ကြောင်တောင်တောင်နဲ့ ကြည့်နေတာ..ဟင်း..။တော်တော်ဗိန်းတဲ့ နိုင်ငံခြားသားတွေ..။
ဗမာပြောလည်းမသိ။ဗားမားလည်း..နိုး။မြန်မာဆိုလည်း..ပြူးပြူးကြီးကြည့်ပြီးမေးတယ်။
ဗီယက်နာမ်လား..တဲ့။တချို့ က နိုင်ငံသာမသိတာ...။
ဒေါ်အောင်ဆန်းစုကြည်ဆိုရင် တန်းသိတယ်။

အဆောက်အဦရုံးအတွင်းပိုင်းဖက်မှာ..။

ကလေးတွေနဲ့ ကျောင်းဆရာတွေကို ယူရိုနိုင်ငံတော်တော်များများမှာတွေ့ ရတတ်တယ်။

ကလေးတွေကိုအမြဲ အပြင်လေ့လာရေးအတွက်လုပ်ပေးတာ အရမ်းသဘောကျတယ်။

ဘာလင်တံတိုင်းအပိုင်းအစ တွေ..။

အဲဒီမှာကားတိုက်လို့ အကြာကြီးစောင့်နေရတယ်။

ကဲ..ကားပေါ်ပြန်တက်ပြီ။ ခရီးဆက်သွားမယ်။ကျမတို့ တော့ ၃၊၄ နေရာလောက်ဘဲဆင်းတာပါ။

ကျန်တာတော့ ကားပေါ်ကနေ ငေးမောကြည့်ရူ ဓါတ်ပုံရိုက်..ဒါပါဘဲ။

တခြားကားကဆိုလူတောင်သိပ်မရှိဘူးးး။

Parc du Cinquantenaire  ။

မြို့ လည်ခေါင်ရောက်တော့လှမ်းရိုက်လိုက်တာဘဲ..။

ဒင်း...ရေပန်းက၀င်ရူပ်သွားတယ်..။ :((

ယူရိုပါလီမန်ရှိတော့ တခြားဆိုင်ရာရုံးခန်းတွေလည်းအများကြီးရှိမယ်နဲ့ တူတယ်။

နေ့ လည်စာထွက်စားချိန်လေ..။

လာပြန်ပြီကျောက်တိုင်..။အောက်ခြေကိုရိုက်တော့ အပေါ်ကိုမမိ။

အပ်ါပါအောင်ရိုက်တော့ ကမ္ဘာကြီး တိမ်းစောင်းနေတာကို သက်သေပြနိုင်လိုက်တယ်..။ဟီး

သူတို့ ဆီမှာလည်း ဝေါ်ထရိတ် စင်တာတဲ့..။

ကိုင်း...အလုံးကြီး(ကျမအခေါ်ပေါ့) သူတို့ ကတော့ atomium တဲ့..။ရောက်ပြီ။

မတက်ခင် အဲဒီဆိုင်မှာ နားတယ် သောက်တယ်ပေါ့။မနက်စာမစားဘဲပြေးလာတာလေ..လည်ချင်လို့ ။

အပေါ်ရောက်ရင် ပတ်ချာလည်ရိုက်တာပေါ့..။

စကားမစပ် နိုင်ငံတော်တော်များများမှာ...၊

ဥမမာ..မြို့ တော်လိုနေရာမှာပေါ့၊တမြို့ လုံးကိုစီးမြင်နိုင်တဲ့ နေရာလေးလုပ်ထားပြီး။

Tourist တွေကိုဆွဲဆောင်၊ နားစရာနေရာလေးနဲ့ ၊အမှတ်တရ၀ယ်စရာလေးဆိုပြီး..၊ 

ခရီးသွားတွေဆီက ပိုက်ပိုက်တွေတအားချုလို့ လွယ်တယ်နော်။

ကျမတို့ ဘယ်ရောက်ရောက် အဲလိုအမြင့်ကြီးတွေသွားတက်လေ့ရှိတယ်။

ရန်ကုန်မှာတော့ ရွှေတိဂုံစေတီတော်ထက်မြင့်တာမဆောက်ရဘူးလို့ ပြောတယ်တဲ့။

ဟုတ်မဟုတ်တော့သိပါဘူး။ကြားဘူးနားဝလေးတွေပါ။

ရန်ကုန်တူဌေးဂျီးတွေ ဆောက်ရင်ကောင်းမှာ... (ဆန္ဒလေးပါ)။
ရန်ကုန်မှာ နိုင်ငံခြားသားခရီးသွားတွေဘယ်နေရာသွားလည်ကြလဲမသိဘူး။
(ဘုရားနဲ့ ဗိုလ်ချုပ်ဈေးကလွဲရင် ပြောတာ..)
သွားချင်လို့ ..စိတ်ဝင်စားစရာကောင်းတဲ့နေရာလေးတွေရှိရင်ပြောကြပါအုံး။
ရန်ကုန်မြစ်ထဲမှာ သင်္ဘောတော့စီးဖူးပြီးသွားပြီ။
ကဲပါလေ..လေကြောတော့ တောင်ရောက်မြောက်ရောက်နေပြီ။

ပြန်သွားအုံးမယ်...လေ။
ဘယ်လဂျီယံ ကချောကလက်ဆိုတာ ယူရိုမှာနံမည်အကြီးဆုံးတဲ့...။

ကျမက ဆွစ်ဇာလန် လို့ ထင်တာ.။

နောက်ပြီး ဘယ်လဂျီယံကိုလည်း  သူတို့ က ဘယ်လဂျစ်စကားပြောတယ်ဆိုပြီး..ထင်ခဲ့တာလေ။

ဘယ်လောက်တုံးလဲဆိုတာ...။နောက်မှ သူတို့ က ဒတ်ခ်ျ စကားပြော ၆၀% နဲ့ ပြင်သစ် စကားပြော၄၀% နီးပါးနဲ့ ဂျာမန် နဲနဲပေါင်းစပ်ထားတဲ့နိုင်ငံငယ်လေးဆိုတာ သိလာတာ။

အော်...တောသားဆိုတော့လည်းးးးဟင်းး။:P

ကဲ..အဲဒီအလုံးကြီးနဲ့ကပ်ရပ် မီနီယူရိုမှာတော့ ကျမတို့ ၂ ယောက် ၃၊၄ နာရီလောက်ကြာသွားတယ်။

ခလေးတွေမပြောနဲ့ ကျမတော့အရမ်းကြိုက်တယ်။

ပျော်တယ်။ယူရိုကနိုင်ငံတွေရဲ့ နာမည်ကြီး ပုံစံတူလေးတွေလုပ်ထားတာ..။

ဒိန်းမတ်က အိမ်တွေတဲ့..။အဲဒီစာရေးထားတဲ့ အုတ်ခုံပေါ်က အပြာရောင်ဘုကြီး ကိုကျမအားပါးတရထုထဲ့လိုက်တာလေ..။

နိုင်ငံတော် သီချင်းတွေအကျယ်ကြီးထွက်လာတယ်။

အဲနားရောက်နေတဲ့ လူတသိုက်လန့် သွားတယ်။နောက်ကျမကိုလာမေးတာ နင်ဘယ်လိုလုပ်သိလဲတဲ့။

ဟင်းဟင်းးးကျုပ်စပ်စုစိန်ဆိုတာ ဒင်းတို့ ကမသိတာကိုးးး။

နောက်ဆိုင်ရာနိုင်ငံသုံးငွေ လူဦးရေ အလံ နာမည် ရေးထားတာတွေဖတ်။ဘုကြီးထု..ဟားးးးး။

မိုက်တယ် ပျော်စရာကြီး။နေကလည်း ပူလာတော့ ၀တ်လာတဲ့ အထူထည်တွေက လက်ထဲမှာတပုံတခေါင်းကြီးဘယ်ရတယ်။

စိတ်ဝင်စားရင် ပုံကလစ်လုပ်ပြီးသာဖတ်ပေတော့..။

တချို့ နိုင်ငံဆိုရင် ကြားတောင်မကြားဖူးဘူး။

လူဦးရေလည်းနဲနဲလေးရယ်။

 ဒါက ဘယ်ဂျီယံ..။

 ကားဆိုလည်းသေးသေးလေးတွေ..။

လူလည်းသေးသေးလေး..။လုပ်ထားတတ်လိုက်ကြတာ။

 အင်္ဂလန်...။

 ပြင်သစ်..။

ပြင်သစ်က ကျောက်သားဖြူဘုရားရှိခိုးကျောင်း ပုံစံငယ်နားမှာရုပ်ရှင်ရိုက်နေတာ။

ပေးမတက်ဘူး။ သူတို့ ကိုဒါတ်ရိုက်မှာစိုးလို့ လှည့်ပတ်ပြီးကာထားသေးတယ်။

အီတလီကမျော်စင်ကြီး စောင်းနေလို့ မယ်မီးပြန်တည့်ဖို့ ကြိုးစားကြည့်တာပါ။
အထဲပေးမ၀င်ဘူးလေ..။
ဝေးဝေးကဘဲ စိုးရိမ်ပေးလိုက်ပါတယ်။

 လေယာဉ်ပျံသေးသေးလေးတွေ..ကျမဘုနှိပ်ရင် လေယာဉ်တွေထွက်လာတယ်..ဟီး။

 ဘာလင်က တံတိုင်းအပိုင်းအစ..။

 ဒါဘယ်နိုင်ငံပုံစံလဲမသိပါတော့ဘူး..။

ဒီနိုင်ငံက သူတို့ အသံအတိုင်းဖတ်ရင် "အူစ်တာရိုက် "(ဂျာမာန်ဘာသာ) လို့ ဘဲကြားမိပါတယ်။
English လိုတော့ Austria လို့ ရေးပါတယ်။ကျမတို့ ငယ်ငယ်က  ပထမကမ္ဘာစစ်ကြီး၊
စတင်ပေါ်ပေါက်လာပုံ ဆိုတာ  သမိုင်းမှာသင်ဖူးခဲ့တဲ့လေ။ Austria မင်းသားကြီး ဖာဒီနန် လုပ်ကြံခံရပြီး၊
စတင်ဖြစ်ပွားလာပါသည် ဆိုပြီးအလွှတ်ကျက်မှတ်ခဲ့တာ ခုထိမှတ်မိတယ်။
(ဒါပေမဲ့ အဲဒီနိုင်ငံစကားလုံးပေါင်းကို ခုထိမှန်အောင်ပေါင်းတတ်ဘူး..:P )

 အာကာက လွန်းပျံလား..ဒုံးပျံလား..။

ဒီနိုင်ငံဆိုလုံးသမသိဘူး..။

 အထွက်မှာခလေးတသိုက်နဲ့ တွေ့ တယ်..။

 ကားပေါ်ပြန်တက်တယ်...ဟိုးမြင်ရတာက တရုတ်ပုံစံအိမ်လေး..၊

အဲဒါလည်းလည်စရာတခုထဲမှာပါတယ်။အချိန်မရှိလို့ မ၀င်ခဲ့တော့ဘူး။

ဘုရင့်နန်းတော်..။

 ဘုရင့်တက်တဲ့ဘုရားရှိခိုးကျောင်းတဲ့..။

မြို့ ထဲပြန်ရောက်တော့စိတ်က ၂ခွ ဗျ။ ဆင်းလည်းဆင်းချင်တယ်။

ဟို ကောင်လေးကော့ပြီးပန်းတာလေ..ဟီး။

ကြားဖူးတယ်ဟုတ်လား..။Manneken Pis လို့ ခေါ်တယ်။

အဲဒီကိုသွားမယ်ဆိုပြီး..။

မြို့ လည်ခေါင်မှာမဆင်းတော့ဘူး။

လမ်းကြားထဲမှာ ကျောက်ရုပ်လူ..ပိုက်ပိုက်တောင်းတာပေါ့။

အမြဲတွေ့ ရတယ်။အဲလိုမျိုးတွေ..မလှုပ်မရှပ်ဘဲနေနိုင်ကြတယ်။

Manneken Pis သေးသေးလေးဘဲ..ဟီး။

ရာသီအလိုက်အင်္ကျီတွေဆင်ပေးတတ်တယ်တဲ့။

ဒါနဲ့ ပတ်သက်တာလည်း ပုံပြင်အမျိုးမျိုးပါဘဲ..။

လာပြီလေ...ဝေဖာချောကလက်။

ဝေဖာက တခု ၁ယူရို၊ အပေါ်က ကြိုက်တာယူဈေးအမျိုးမျိုးဘဲ..။

ကျမယူလိုက်တာ စတော်ဘယ်ရီနဲ့ ၅ ယူရိုကျော်ကျသွားတယ်..။

အီးးးးကောင်းလည်းကောင်းဘူး..။

 နောက်တနေရာဝင်သေးတယ်။

နံမည်ကြီး Grand Place ။

Brussels Town Hall

အဲဒီအလယ်ကွက်လပ် နေရာမှာ ၂ နှစ်တခါ သြဂုတ်လ ဆိုရင် ပန်းကော်ဇော်ကြီး လုပ်ထားတယ်။

ကျမရိုက်တဲ့ပုံမဟုတ်ပါဘူး...အဟဲ။
လှလို့ ပြတာ...

အထွက်ဖက်မှာ ဒီကြေးရုပ်ကိုလူတိုင်းပွတ်ပွတ်သွားတော့ကျမလည်းလိုက်ပွတ်တယ်။

ဘာမှန်းကိုမသိပါဘူး..(ဒီလိုကြောင်တတ်ပါတယ်လေ)။

ကိုင်းပြေးရတော့မယ်..။

(ဆေးလိပ်လည်းတိုနေလည်းညိုပြီ ငါ့အိမ်ပြန်ပို့ ကြလေ... ဆိုသလိုပေါ့)။

 ကိုယ်တို့ စီးခဲ့တဲ့ရထားဟုတ်ဘူး..။

နေပျိုချိန်မှာထွက်.. နေညိုချိန်..အိမ်ပြန်ကြတာပေါ့...။
ခင်မင်တတ်တဲ့
မီးမီး