အဆောက်အဦဟောင်းဖျက်သိမ်းပြီးအခြေခံအုတ်မြစ်ပြန်ချခြင်း..

မင်္ဂလာပါရှင်~~~~

အဟွန့်..ခေါင်းစဉ်ဖတ်ပြီးမယ်ငီးတယောက်နိုင်ငံရေးစလုပ်ပြီလို့ထင်ကြမယ်...။

တိုင်းသူပြည်သားအားလုံးနေ့စဉ်လုပ်ဆောင်နေတာတွေဟာနိုင်ငံရေးတဲ့...။

စာစောင်တခုထဲမှာဖတ်မိသလိုပါဘဲ..။

ဒီတော့ ကျမတို့နေ့စဉ်ရုန်းကန်စားသောက်နေတာတွေဟာနိုင်ငံရေးတခုဘဲပေါ့နော်...။

လိုရာဆွဲတွေးပြီး အတင်းဆွဲစေ့လိုက်ပါတယ်...(အဟဲ)

ကျမပြောပြခဲ့တာတွေ၊အာလူးဖုတ်ခဲ့တာတွေဟာမြန်မာနိုင်ငံကလူမျိုးပေါင်း ၁၃၅ မျိုးရှိတဲ့အထဲမှာ ၊ 

အကြီးဆုံးပြည်နယ်တခုက လူမျိုးစုငယ်များစွာ နေထိုင်လုပ်ကိုင်စားသောက်ပုံတွေ ...ဆိုပါတော့..။

ကဲ...မသိဖူးတာတွေ မမြင်ဖူးတာတွေ တွေ့ရတယ်..။

ကိုယ့်နိုင်ငံက လူမျိုးအကြောင်းတွေ ပိုသိလာတယ်...ဒီတော့ မယ်ငီးက နိုင်ငံရေးလုပ်နေတယ်..

လို့သဘောထားပေးလိုက်ပေါ့နော်.....

ဟားဟား....သူများတွေ ပြောကြဆိုကြလွန်းလို့၊လူတတ်ကြီးလုပ်ပြီး ပြောကြည့်တာပါ...။

တကယ်ဆို ဒီမယ်ငီး ငချွတ်လေး ဘာသိမှာတုံး...ဘာမှမသိ၊ ကိုယ့်သွားနေတဲ့လမ်းရဲ့တမိုက်လောက်ဘဲ၊

ကြည့်ရှောက်တတ်တဲ့လူသားတယောက်ပါ...^_^

ဟင်းဟင်း....လာပါ...အိမ်ဆောက်ကြရအောင်....။

ကျမဒီတခါ ပြန်ရင် အိမ်ဆောက်ကန်ထရိုက်တာကြီးလုပ်မလို့....။

သူများတွေလည်း..ဒီလိုဘဲ ရှာစားနေကြတာ...ဖြစ်တာဘဲ...။

အလုပ်မရှိမှာစိုးလို့မပြန်နိုင်သူတွေပူနဲ့နော်...။

ကဲ..အတွေ့အကြုံလေးတွေမျှအုံးမယ်လေ...။

ရန်ကုန်မှာ အိမ်ဖျက်၊တိုက်ဖျက်ရင် ဘယ်လိုလုပ်ကြလဲ မသိဘူး...။

ကျမတို့ဆီမှာ အိမ်ရဲ့ခိုင်မာမှု့ရှိမရှိအုတ်၊ကိုကြည့်တယ်။တူနဲ့ထုရမှာလေ...။

ပြီးတော့ဈေးဖြတ်တာပေါ့..။အင်း..ဘယ်လောက်လဲဟုတ်လား.
ရမ်းတုတ်ပြီးတွက်ချက်ပေးလိုက်တယ်လေ။

machine ဆိုတာမှ မရှိတာ manual လေဗျာ..လျှပ်စစ်မီးဆိုတာ ဘာလဲဗျ...။

အော်...ခရမ်းချဉ်သီးလေးလို နီဖန့်ဖန့်လေးနဲ့ည ၁၂ နာရီလောက်မှာ
အိမ်လည်ခေါင်ထိပ်က ဟာလေး

ကိုပြောတာလား.။ဘုရားမီးအဖြစ်ပူဇော်လို့တောင်မဖြစ်ပါဘူး..။
ဖယောင်းတိုင်ကသူ့ထက်ပိုလင်းပါတယ်..။

လူဘယ်နှစ်ယောက်သုံးပြီးဘယ်နှစ်ရက်လုပ်ရမလဲဆိုတာမူတည်ပြီး ဈေးဖြတ်ပါတယ်..။

အိမ်ဖျက်ပြီးထွက်လာတဲ့ အကျိုးအပျက်တွေကိုပစ်ဖို့ဘယ်ဖို့
ကား ၂ စင်းလောက် အဆင်သင့်ဌားထားရတယ်။ တခါ ၅ဝဝဝ တဲ့...။
ကျမအမရဲ့တပည့်လေး..မို့လို့ဒီဈေးနဲ့ရတယ်..။

ဘယ်တာတော့ဟုတ်ပြီ..ဘယ်မှာသွားပစ်မလဲ..။
မြို့ပြင်က ချိုင့်ခွက်နေရာကြည့်ပြီးသာ သွန်လိုက်ပါ..ပေါ့..။

တနေ့ကို အခေါက်ပေါင်း ၂ဝကျော်တယ်...။မြေတူးပြီးလည်းပစ်ရတယ်လေ...။

ကံကောင်းထောက်မစွာနဲ့ မြေကို ရောင်းလို့ရပါတယ် ကားတစင်းကို ၃ဝဝဝ...။

မြေဖိုး အခေါက် ၂ဝကျော်လောက်ပြန်ရတယ်...။ အခေါက်ရေပေါင်း ၄ဝ  ကျော်ဘယ်ရတယ်...။

အုတ်ကလည်းရှေးအုတ်ပိုကြီးပြီးထူတယ်..။အားလုံးနီးပါးပြန်သုံးလို့ရတယ်...။

အုတ်စိမ်းတွေတော့ ဝဲထုတ်ရတာပေါ့...။ မြေကြီးဘဝအဖြစ် အသွင်ပြောင်းသွားတယ်လေ...။

သွပ် နဲ့သစ်လည်း..အားလုံးပြန်သုံးတယ်...။ ဖျက်တဲ့အချိန်မှာတော့ နဲနဲကြည့်ရတယ်..။ 

အလုပ်သမားတွေနဲ့ရင်းနှီးမှု့ယူထားရတာပေါ့...။

နို့မို့ရင် ပစ်စလက်ခတ်လုပ်လိုက်ရင်လည်း ပြန်သုံးလို့မရဘူးလေ...။

ဒီလိုပြောင်သလင်းခါနေအောင်ရှင်းရပါတယ်...။

ပြီးမြေတိုင်းမယ်ပေါ့...ဘာစက်မှမလိုပါဘူး...။ရေပိုက်လေး ရေဖြည့်၊ ရေချိန်ညှိတာတဲ့...။

ဟိုထိပ်ကလူက တဖူးဖူးမှုတ်လို့...။ဒီအလုပ်က ပြည်မကလာတဲ့လက်သမားဆရာကြီးတွေလုပ်တာ။

သူတို့က ဟိုး..နှစ်ပေါင်း ၂ဝနီးပါး ကျိုင်းတုံကိုရောက်နေကြတာတဲ့..။

ဒီက အာခါလူမျိူးတွေနဲ့အိမ်ထောင်ကြလို့၊ခလေးတွေဘာတွေနဲ့၊ရှမ်းစကားသာမတတ်တာ..။

အာခါစကားကိုမွတ်နေတာဘဲ...။ ကျမကိုရေနွေးကြမ်းလာတောင်းသောက်တယ်..။

သူတို့ဆရာက ရေနွေးအိုးမတည်ပေးပါနဲ့၊ထမင်းစားမှသာပေးပါလို့ပြောထားတယ်လေ..။

ကွမ်းလည်းမဝါးခိုင်းဘူး..။အလုပ်ပျက်တယ်တဲ့...။စည်းကမ်းကြီးတယ်..။

ကျမတော့ ရေနွေးဓါတ်ဗူးလိုက်ချပေးပြီး သူတို့ဆရာလာရင် ဖွက်ပေးရတာအမော..ရှင့်...။

အိမ်ဖျက်တော့လည်း အလုပ်ကြမ်းသမားတွေနဲ့မဖျက်ဘူး..။လက်သမားဆရာတွေနဲ့ဖျက်တယ်..။

သူတို့ကနားလည်တယ်လေ..သစ်တွေဘယ်နေရာပြန်သုံးလို့ရမရ..။စုပုံပြီးထားတာကိုက စနစ်တကျပါ။

အိမ်နံရံအုတ်ဖြိုမှ အလုပ်ကြမ်းသမားတွေနဲ့..ကောင်လေးတွေ..ငယ်ငယ်လေးတွေပါ...။ 

တိုင်းထွာပြီးမြေအရာပေးလို့ အခြေခံအုတ်မြစ်ချဖို့ကျင်းတူးရပါတယ်...။

အိမ်က ၂ထပ်ဆောက်မှာမို့လို့ ၈ပေ အနက်တူးရတယ်တဲ့...။
တမြို့လုံးဒီလိုတွက်ကြတယ်တဲ့။တထပ်ဆို ၄ပေ...။
၃ထပ်ဆို ၁ဝပေကျော် တူးပေးရတယ်တဲ့..။

ကျမဦးလေးက လမ်းဝန်ထောက်အငြိမ်းစားပါ သူပြောတာက
ဒီလို နိယာမ သူလည်းမကြားဖူး...ပါတဲ့..။

ကျိုင်းတုံနိယာမတရပ်..ဆိုပါတော့...။

ပြီးရင် ဟော..ကျောက်ကြီးတွေ ကား ၄ စင်းဝယ်ရပါတယ်...။

အဲ့..ကျောက်တွေကျင်းထဲထဲ့ရပါတယ်...။

ပြီးဘိလပ်မြေတထပ်လောင်းပါတယ် ။

 

 နောက်သူတို့အခေါ်အုတ်ဖိနပ်ထဲ့ပါတယ်...။

နောက်ဘိလပ်မြေထပ်လောင်းပါတယ်...။

 ဘိလပ်မြေတွေ ကုန်သလားမပြောနဲ့...။

တညလောက်သိပ်ပြီး...

 

အုတ်နဲ့တိုင်ပတ်ပတ်လည်ကို ပြန်စီတယ်။ အထဲဖက်ကိုတော့ ဘိလပ်မြေထပ်လောင်းပြီး၊

အပြင်ဖက်ကြတော့ အုတ်ကျိုးတွေပြန်ထဲ့ပါတယ်...။

အားလုံးပြီးသွားပြီဆိုမှ ကျမက အိမ်ကိုနောက်တပေခွဲထပ်မြင့်လိုက်တဲ့အတွက်၊ သံချောင်းတွေနဲ့ဘောင်ခပ်၊

ပြီးမြေကိုမြင့်အောင်လုပ်ရပါတယ်.... ။ကျမတို့အိမ်က ကုန်းအတက်မှာဆိုတော့မြေမျက်နှာပြင်မညီပါဘူး..။

ရေချိုးခန်းအိမ်သာက..ဟိုးနောက်ဆုံးမှာ ပြီးတောင်ပေါ်လို မြင့်တက်နေတာပေါ့...။

ဒါကြောင့်အိမ်အရှေ့ကိုမြင့်လိုက်တယ်လေ..။

အိမ်ပြင်နီယာမကြီးလေ...အဟဲ..အင်ဂျင်နီယာဟုတ်ဘူးဗျ..:P

ကိုယ့်ဖာသာကိုယ်တတ်သလောက်မှတ်သလောက်နဲ့ဝါးချလိုက်တာပါဘဲ...။

အဲဒီအထဲကို သဲတွေအများကြီးထဲ့ရတယ်...။ ရေလောင်းဆိုတော့..၊ရေတွင်းခန်းအောင်

တညလုံးကျမလောင်းပါတယ်..။ကျမမပစ်ရသေးတဲ့မြေတွေနဲ့လည်းပြန်ဖို့ပါတယ်...။

မနက်ဆိုရင် မြူနှင်းတွေကျပြီး အရမ်းအေးနေတဲ့အချိန် မှာတွေပေါ့..ကျမကရေပိုက်ကြီးဆွဲပြီး အလုပ်လုပ်နေပြီ..။သူတို့လာနေကျမနက်ရနာရီခွဲမတိုင်မှီ..လုပ်စရာရှိတာတွေလုပ်ထားရတယ်...။

အလယ်ကတိုင်တွေကိုပါ တခါထဲလောင်းလိုက်တယ်...။

မြေဖို့၊သဲဖို့...။

ဘိလပ်မြေလောင်း...။

ဟောသူတို့တောင် နေ့လည် ၃နာရီနားတဲ့အချိန် မှာထိုင်နေလို့ရပြီ....

ကျမက ညနေ ၃ နာရီ ဆိုရင် သူတို့ကို အမြဲတခုခုကျွေးတယ်...လေ..။

ထုံးစံရယ်လို့မရှိပေမဲ့ ကိုယ်စားနေတာကို ကြည့်နေတဲ့မျက်လုံးလေးတွေက သနားစရာကောင်းတယ်..။

နောက်မှသူတို့ရဲ့အစားအသောက်တွေအကြောင်းပြောမယ်..အာလူးဖုတ်မယ်လေ...။

ကဲ...ခုတော့ မယ်ငီး အခြေခံကောင်းသွားပြီနော်....။

ခိုင်ခိုင်မာမာ အုတ်မြစ်ချလိုက်ပါပြီ...။

မိတ်ဆွေ...အိမ်တွေများဆောက်ချင်တဲ့စိတ်ဆန္ဒရှိခဲ့ရင်လည်း...ခေါ်ပါနော်...။

ကန်ထရိုက်တာကြီး....လုပ်မှာဗျ....

အားလုံးဘဲရွှင်လန်းချမ်းမြေ့ကြပါစေရှင်~~~~

မီးမီး